بسم الله نبدأ حديثنا النهاردة بالحديث عن شخصية عظيمة معروفة بالزهد والعدل, طبعا التاريخ الاسلامي ملئ بالشخصيات المعروفة اللي كان ليها دور فعال وكمان كان لها بصمة مميزة في تاريخ الاسلام ومن اهم الشخصيات دي عمر بن عبد العزيز اللي بيضرب به المثل في العدل
كان اسمه عمر بن عبد العزيز بن مروان بن الحكم بن ابي العاص بن امية وصولا لمعد بن عدنان ولد سنة 61هجريا في المدينة المنورة ونشأ وعاش فيها , كان والده عبد العزيز من امراء بني امية اما والدته فهي بنت عاصم بن عمر بن الخطاب رضي الله عنه
نشأ عمر بن عبد العزيز في نعيم ورفاهية لان كان ابوه امير علي مصر وعمه الخليفة عبد الملك, ولكن النعيم ده ممنعوش من انه يتم حفظ القرآن ويتعلم علي ايد كبار التابعين منهم سعيد بن المسيب وكان من اهم اسباب استقامتة تعلقه الشديد بعم امه عبدالله بن عمر رضي الله عنه وتربيته في المدينة بين اخواله اللي اتعلم منهم الكثير وكمان اتأثر بيهم فكان بيبكي كتيرمن خشية الله و بيحب مجالس العلم
وفيه قصة مشهورة بتقول انه لما كان عمر صغير دخل الي اسطبل والده عبد العزيز بن مروان عشان يشوف الخيل فضربه فرس في وجهه فشج ولما والده كان بيمسح الدم من علي وجهه كان يقول ( ان كنت اشج بني امية انك اذا لسعيد ) ولما شافه اخوه قال ( الله اكبر هذا اشج بني مروان وكان الفاروق عمر بن الخطاب يقول :ان من ولدي رجلا بوجهه اثر يملأ الارض عدلا ).
يا تري عمر بن عبد العزيز كان شكله ازاي تعالو نشوف اوصافه يقال انه كان نحيف الجسم اسمر رقيق الوجه غائر العينين و حسن اللحية وكان صاحب مكارم واخلاق حسنة بعيد جدا عن طيش الشباب وكان دايما ملتزم وبيتبع الحق والدين
تولي عمر امارة المدينة في عهد الوليد وكان ده في سنة 86 هجريا الي 93هجريا وبعد كده اتوسعت ولايته فبقي والي علي الحجاز ونشر الامن والعدل ولما مرض سليمان بن عبد الملك اوصي بالخلافة له من بعده ولما توفي اصبح عمر امير للمؤمنين وعين عشرة من فقهاء المدينة للشوري وكان دقيق جدا في اختيار الفقهاء والولاة وكان دايما يفكر في المحتاجين والمظلومين وبعد توليه الخلافة ترك قصر الخلافة اللي في دمشق وراح يعيش في بيته البسيط اللي مفيهوش غير الحصير وكمان ترك كل الملابس بتاعته واتبرع بيها لبيت مال المسلمين فكان ذاهد في الحياة بشكل كبير جدا لدرجة انه كان لا يملك غير قميص واحد كان لما يغسلوه ميخرجش من البيت الا اما ينشف
لما تولي الخلافة امر بالغاء موكب الخليفة وقال 🙁 مالي وهذه المراكب اصرفوها عني وهاتو بغلتي ) و كمان باع اثاث بيت الخلافة ووضع ماله في بيت مال المسلمين
وبالرغم من ان فترة حكمه كانت قصيرة جدا كانت سنتين وكام شهر الا انها كانت مليانة بأعمال عظيمة وانجازات كتير اللي خلدت اسمه في التاريخ ومن الاعمال دي ان الدولة الاسلامية تبنت تدوين السنة النبوية رسميا فبعث للامسار يأمر العلماء بجمع الاحاديث وتدوينها وكتب قال 🙁 انظروا حديث رسول الله صلي الله عليه وسلم فاكتبوه فاني خفت دروس العلم وذهاب اهله )
وكان سبب الاهتمام بجمع الاحاديث هو خوفه الشديد من ان الاحاديث تضيع بعد وفاة الرسول عليه الصلاة والسلام ووفاة الصحابة والتابعين
وقام بتعيين عدد من الاشخاص الصالحين اللي كان معروف عنهم الحق والامانة والصدق وقام بتأسيس مجلس شوري في المدينة المنورة واطلق عليه اسم مجلس فقهاء المدينة العشرة ومش بس كده كمان قام بتوسيع المسجد النبوي الشريف وكان بيحب نشر العلم بين كل الناس عشان يتفقه اكبر عدد ممكن في امور الدين وكان بيبعت عدد من اهل العلم عشان يعلموا الناس من جميع الاعمار وجميع الفئات
ده غير انه رد المظالم لاهلها ورجع الاموال اللي خدوها من بيت مال المسلمين اللي خدوها قبل حكمه ونظم الولايات وقام بسحب جيوش
المسلمين من المناطق البعيدة وقرب الفتوحات عشان متكونش سبب في ارهاق جيوش المسلمين وعزل كل الوزراء والولاة اللي كان معينهم سليمان بن عبد الملك ورد المظالم لاهلها ونشر العدل بين الناس وقال عنه الامام الشافعي 🙁 الخلفاء خمسة – ابو بكر وعمر وعثمان وعلي وعمر بن عبد العزيز )
توفي عمر بن عبد العزيز بسبب السم الذي وضعه له خادم له مقابل الف دينار ولما عرف عمر باللي عمله الخادم سأله ايه اللي خلاك تعمل كده ولما عرف انه عشان المال اخد منه الالف دينار واودعهم في بيت مال المسلمين وطلب منه انه يستخبي عشان محدش يشوفه وفيه رواية تانية بتقول انه حصل خلاف بين عمر وبين بعض الاشخاص من بني امية لانه اخد املاكهم اللي استولو عليها من غير حق ورجعها بيت المال وعشان كده وضعوا له السم ولما حس عمر باقتراب الموت جمع اولاده ووصاهم بتقوي الله عز وجل
توفي عمر بن عبد العزيز سنة 101 هجريا يوم 20 من شهر رجب وكان عمره وقتها 39 سنة ودفن في حمص بسوريا وبعد وفاته فضل الناس تقول مات خير الناس من بينهم كان حسن البصري
بس الشيعه كان موقفهم واحد من كل خلفاء بني امية وكانوا شايفين ان كل خلفاء بني امية اشتركوا في اخذ السلطة من الامام علي وابنائه وكانوا شايفين ان مواقف الخليفة الاموي عمر بن عبد العزيز اللي اتعرفت بالعدل والحق ما هي الا ذكاء سياسي وفي كمان ناشطون قالوا ان تم نبش ضريح يقال انه ضريح الخليفة عمر بن عبد العزيز