شيخ الجبل الحسن الصباح ,قائد الحشاشين الذي أرعب الملوك و الأمراء
الحسن الصباح
السلام عليكم اهلا وسهلا بحضراتكم في حلقة جديدة في خلاصة كتاب
موضوع حلقتنا اليوم حارت ودارت فيه الناس كتير
هل هو نصاب ضحك على اتباعه بالحشيش ووعد بجنة الخلد والعذارى في الجنة ؟
ولا هو قائد وملهم ومحارب وقدر يخلي ممالك بتلف حوالين نفسها ومش ممالك سهلة فعندك في الشرق كان عامل صداع للدولة السلجوقية وفي الغرب عامل صداع للقائد صلاح الدين الايوبي وخاصة بعد محاولة اغتياله
ولا هو إمام واتباع اوامره واجبة ويجب طاعته بشكل اعمى
في الواقع الراجل اللي معانا انهاردة اختلفت حواليه الآراء وكان مثير للجدل بشكل كبير ولكن احنا هنا عشان نعرضلك الموضوع باختصار مش بنقول انه وحش ولا بنقول انه كويس بنقول ان الشخص ده من اهم الشخصيات اللي اثرت وسابت بصمة مهمة في التاريخ
معانا ومعاكم اللي هيكون ضيف حلقتنا رحبوا معانا بـ شيخ الجبل.
حسن بن علي بن محمد الصباح الحميري، أو حسن الصباح، الاسم اللي كان صداه بيزلزل ممالك بحالها وبيصيب الرعب في قلوب الملوك والامراء والوزراء واكيد الاسم ده وراه حكاية خلينا نعرفها مع بعض
بترجع الحكاية لسنة 1037 م اتولد الطفل حسن الصباح في مدينة الري في إيران، مع وجود مصادر تانية بتقول ان تمت ولادته في مدينة قم نظرًا للخلفية الشيعية اللي كانت عنده من صغره، نظرًا لكون المدينة معقل للطائفة الاثنى عشرية من الشيعة.
ومن خلال مذكراته بنعرف انه اتاثر اوي برفيقه في الفترة دي وهو عميرة زاراب، اللي كان دايمًا بيكلمه عن مصر وعن الفاطميين والطائفة الاسماعيلية.
وبيرجح كتير من المؤرخين ان كلام زاراب كان له الاثر والسبب ورا ان الصباح يبدأ في تلقي تعليم المذهب الاسماعيلي وانه في 1072 يقسم على الولاء ادام المبشر الاسماعيلي عبد الملك بن عطاش اللي كان في زيارة لمدينة الري وقتها، واللي حدد لحسن الصباح مهمة أنه لابد من سفره لمصر عشان يسجل اسمه للمنضمين للفاطميين في البلاط الفاطمي.
وفعلا في 1076 بدأ الصباح رحلته اللي انطلقت من إيران لحد ما وصل لأصفهان، وبعدها سافر لميافارقين بلد قديمة كانت بتطل على نهر الفرات، وفضل فيها لحد ما الحاكم طرده بعد اعتراضاته المستمرة وإنكاره سلطة علماء السنة.
عشان بعد طرده يسافر لفلسطين عشان يوصل الصباح مصر في 1078، وعلى حسب المؤرخين فضل حسن الصباح في مصر حوالي 3 سنوات يتم تلقينه تعاليم المذهب الاسماعيلي، وكان ما بين القاهرة والاسكندرية، لكن سبب تركه مصر غير معروف فعلى حسب المؤرخين ان سبب طرده كان بعد خلافات اتكونت ما بينه وبين قائد الجيوش بدر الدين الجمالي اللي أمر بسجنه وطرده على مركب كانت في طريقها لشمال افريقيا لكن السفينة غرقت في الطريق، ونجح الصباح انه يكون الناجي الوحيد ويوصل على بغداد اللي منها رجع لمدينة اصفهان في 1081.
وبعد رجوعه لإيران عاش حياته يتنقل ما بين المدن المختلفة، وكان دايما تنقلانه بيحاول يتحاشى فيها المدن، فكان دايما بيختار المرور من خلال الصحراء، وعشان كدة اطلق عليه سيد الصحراء، وفضل يتنقل لمدة 3 سنين لحد ما استقر في دامغان ومكتفاش بالاستقرار فيها لكنه حولها لقاعدة مركزية كان بيبعت من خلالها الدعاة، للقبائل المقيمة في الجبل يدعوهم للاسماعيلية والعودة والاقامة في مدينة دامغان معاه وتحت حمايته واللي كان كتير منهم بيوافق، وبدأ يطلق عليه لقب شيخ الجبل.
ومكتفاش حسن الصباح بالدعوة فقط للمذهب الاسماعيلي لكنه كمان بدأ يدعو ويرسل رسله للدعوة للمذهب الباطني، لحد ما انكشف امره وتم القبض عليه وسجنه وامر الوزير نظام الملك باعتقاله وكمان اعدامه، لكونه خارج على الحاكم لكن في الجزئية دي المؤرخين بيقولوا قدر يهرب الى قزوين، في الوقت اللي مؤرخين تانيين بيقولوا انه تم العفو عنه، بعد ما تدخل عمر الخيام، وطلب من صديقه الوزير نظام الملك، انه يتم الافراج عن الصباح نظرًا لعلاقة الثلاثة القوية، وفعلا وافق نظام الملك لكن شرط ان يتم نفيه إلى قزوين، وعن علاقة الصباح والخيام لينا حكاية بس مش دلوقتي.
اوعى تكون تهت مني دلوقتي حسن الصباح هرب لقزوين بعد ما كان بدا يدعو للباطنية وعلى مشارف وابواب انه يبدأ في حفر اسمه في التاريخ، ويبدأ يصطدم مع الكبار، فبعد اسقرار حسن في قزوين ارسل رسوله الحكيم المنجم لمدينة حلب، عشان يستميل ملكها السلجوقي رضوان بن تتش، للدخول في المذهب الباطني، وتكون حلب هي المدينة المركزية اللي يتم ارسال الباطنيين منها، لبداية عمليات الاغتيالات وتغيير خريطة العالم، نظرًا للشجاعة اللي بيتحلى بيها الباطنيين في الشام عمومًا وحلب خصوصًا، وفعلا وافق رضوان.
وبدأ يكون في مدينة حلب مقر للدعوة للمذهب الباطني، وكمان معسكرات تدريبية، والامر اللي لما وصل للسلطان السلجوقي محمد بن ملك شاه بدأ يفهم أن الوضع بقى خطر في مدينة حلب، في الوقت ده كان توفى رضوان بن التتش، وجه مكانه ابنه الب ارسلان بن رضوان بن التتش واللي بدأ حكمه برسالة من السلطان محمد بن ملك شاه بيأمره فيها، بالقضاء على الباطنية في حلب نظرًا لخطورتهم.
وفعلا بدأ ألب أرسلان القضاء على الباطنية ومقر دعوتهم في حلب، وقتل كتير منهم وخد اموالهم وطاردهم لحد خروجهم من حلب نهائيًا، طيب حسن الصباح كان فين في كل اللي بيحصل ده؟
حسن الصباح في الوقت ده ونظرًا لتفتيح عين السلاجقة على امر الباطنية، وخطورتهم، كان بيفكر على عمل مكان بعيد تمامًا عن عيون ملوك السلاجقة، يكون مجرد ذكر اسمه يرعب الملوك والامراء، ويبدأ من خلاله نشر دعوته الخاصة، وعمل معسكرات للتدريبات فيه، ويكون مدينة مصغرة مقفولة على نفسها ويكون نتاج أولادها ليها، سواء المحاربين، أو اصحاب المهن التانية، ونظرًا لتضييق الخناق عليه وعلى اللي كانوا معاه هاجر الصباح لقلعة آلموت.
وقلعة الموت هي عبارة عن حصن قديم، كان يقع فوق صخرة عالية على ارتفاع 2100 متر، وتم بناء الحصن عشان يكون مدينة صغيرة جدًا بيوتها واقعة على منحدر دائري، وملهاش الا طريق دخول وخروج واحد، نظرًا أن ضهرها هو المنحدر، وعشان كدة اي وسيلة لاختراقه او الهجوم عليه تقريبا شبه مستحيلة نظرًا للانحدار اللي تم بناء الحصن عليه.
ولحد يومنا الحالي متعرفش بالظبط مين اللي بنا حصن آلموت، والاسم جيه من اللغة الفارسية القديمة “آلوه موت” واللي معناها عش النسر، واقتحم حسن الصباح الحصن هو واللي معاه من الباطنية سنة 483 هـ، 1090 م، وطرد الحاكم العلوي منها، ويقول ابن الاسير ان حسن الصباح بعد ما طرد الحاكم العلوي للقلعة اداله 3000 دينار دهب كتمن للقلعة، لكن محدش يعرف مدى صحة القصة دي من عدمها.
حول حسن الصباح الحصن لمدينة مركزية، فضل فيها لمدة 35 سنة مخرجش منها لحد وفاته، وكان بيتم فيها التدريبات، وارسال الدعاة للمنهج الباطني، والملوك اللي كانوا بيرفضوا دخول رسله بالتأكيد كان بيكون ليهم حظ وافر جدا انهم يكونوا على قائمة اغتيالاته، فاول قتيل على ايد الباطنية كان مؤذن من مدينة ساوة، واللي لما دعوه للباطنية ورفض وهدد انه هيبلغ الوزير نظام الملك قتلوه، ولما عرف نظام الملك طاردهم لحد ما لقى نجار اسمه طاهر هو اللي كان ورا مقتل المؤذن فقتله ومثل بجثته عشان يكون عبرة وعشان يكون ده اول قتيل من الباطنيين.
فشلوا السلاجقة في القضاء على حسن الصباح سنة 1092، وخاصة بعد ما ارسل السلطان ملك شاه جيشين، للقضاء عليه وعلى قلعة الموت والباطنية كلها، ولكن الحملة فشلت فشل ذريع، وبيرجع المؤرخين ان يعتبر الاغتيال اللي اسس قواعد الباطنية وخلى اسمهم يسبب رعب للملوك، كانت عملية اغتيال الوزير نظام الملك اللي خطط ليها الصباح بنفسه، عشان تكون اول عملية اغتيال سياسي كبيرة يقوم بيها الحشاشين.
فبيقول الرحال ماركو بولو ان اسم الحشاشين جيه نظرًا للاجتماعات اللي كان بيعملها حسن الصباح للفدائيين قبل ذهابهم لتنفيذ اي عملية اغتيال، وبيشربهم فيها مخدر الحشيش، ويوعدهم بجنة الخلد والعذارى وان فداء النفس يجعل الشخص اقرب للجنة، للدرجة اللي خلت بعضهم يخطط لاغتيال صلاح الدين الايوبي نفسه في فترة من الفترات، وان كلمة الحشاشين هي الكلمة اللي جت منها كلمة Assassin، اي الشخص اللي بيقوم بعملية الاغتيال.
مات حسن الصباح في 1124 م، بعض المؤرخين قالوا انه توفى بعد ما كان سبب في اغتيال ملوك وسلاطين في الدول العربية كتير، وارسى قواعد للحشاشيين استمرت لحد 1256 لحد ماتم القضاء عليهم نهائيًا من هولاكو قائد المغول، وطاردهم الظاهر بيبرس سنة 1273م، وكان بيتم اعدام كل اللي يتم اثبات انضمامه للباطنية أو الحشاشين بدون كلام، ومات الصباح وهو ملوش ولد ولا ذرية مات موتة طبيعية بعد ما ساب علامة واثر في التاريخ باسمه فضلت لحد يومنا ده وكان حجر الاساس لكتير من الجماعات الارهابية بشكلها المعروف دلوقتي.
اما عن قصته مع عمر الخيام فيقال في بعض الكتب ان اول مقابلة تمت ما بينهم كان وعمر الخيام بيتمشى في السوق قابل واتعرف على حسن الصباح للمرة الأولى كان بيتم فيها بيعه كعبد وبعد سنين اتقابلوا تاني وقتها كان عمر الخيام الباحث، الفيلسوف، عالم الهندسة والرياضيات والفلك، والشاعر، والصوفي، في الوقت اللي كان فيه حسن الصباح هو التقي الورع اللي بيلف المدن يحرم الحرام ويحلل الحلال ، ويتكلم ويناقش في امور الدين والدنيا، وبيدعو باجتهاد للمذهب الاسماعيلي، وكان الخيام السبب لتعارف بين نظام الملك والصباح.
والمرة التالتة اللي يقال ان تم الاجتماع بين الخيام والصباح لما الصباح اعطى اوامره بقتل الخيام، نظرًا لمجونه وفجوره اللي بينشره من خلال شعره، وأنه هو بنفسه كان على راس الكتيبة اللي راحت عشان تقتله انت متخيل لو صحت القصة دي، قتل صاحبه اللي كان ليه سبب في انقاذه من السجن قبل كدة، ويقال انه مقتلوش ولكن قتل حبيبته وخادمه.
هل صح؟ هل الرواية غلط؟ الله اعلى واعلم
لكن اللي متاكد منه ان حسن الصباح علامة لا تنسى في التاريخ زي ما نظام الملك وعمر الخيام سابوا علامتهم في التاريخ كل واحد بطريقته الخاصة
يارب تكون الحلقة عجبتكم، ومنكونش طولنا عليكم ولو عجبتك الحلقة متنساش تدي اللايك المتين وتقولنا رايك شايف حسن الصباح ازاي في التعليقات
لمشاهدة الفيديو علي اليوتيوب