اهلا وسهلا بحضراتكم فى حلقة جديدة من خلاصة كتاب , وحلقتنا النهاردة بتتكلم عن شخصية من العصر الاموى , وهو معاوية بن يزيد ولقب بمعاوية الثانى .
اسمه معاوية بن يزيد بن معاوية بن سفيان بن صخر بن حرب بن امية القرشى , اتعرف بابويزيد واتعرف كمان بابو ليلى وبيعتبر ثالث خلفاء بنى امية , اتولد سنة اربعة واربعين هجريا فى الشام , امه هى ام هاشم بنت ابى هاشم بن عتبة بن ربيعة وبتكون والدة خالد بن يزيد الاخ الشقيق لمعاوية .
معاوية بن يزيد كان ابيض شديد البياض كثير الشعر ,كبير العينين اجعد الشعر مدور الراس جميل الوجه , وحسن الجسم , اتجوز معاوية بن يزيد تلات مرات لكن زوجته الاولى ماتت , اما الزوجتيين اللى اتجوزهم بعدها نفر منهم وبعد عنهم قبل ما يخلفوا اى ولد له, كان معاوية بن يزيد شاب تقى , وصل للخلافة بعد ابوه يزيد فى اربعة عشر من شهر ربيع الاول سنة اربعة وستين هجريا , ومفضلش فى الحكم اكتر من ثلاثة شهور وقالو انه ملك اربعين يوم بس .
كان مدة حكمه قصيرة, وكان مريض مدة ولايته وعشان كده متسجلش له اعمال فى وقت خلافته , ومع ذلك بنلاقى معاوية بن يزيد كان ظاهرة اموية نادرة وفريدة من نوعها , وده كان بسبب موقفه من الخلافة لانه فكر فى التنحى عن الخلافة بعد فترة قليلة من مبايعته .
وكان شايف الانقسام اللى حصل بين المسلمين فى الوقت ده , ومكنش قادر يلم شملهم , واختلف المؤرخين حوالين مدة حكمه , لكن على الارجح كانت مدة حكمه ثلاثة شهور , ويقال ان معاوية بعد وفاة والده يزيد طلع على المنبر وقال (ان هذه الخلافة حبل الله وان جدى معاوية نازع الامر اهله ومن هو احق به منه على بن ابى طالب رضى الله عنه , وركب بكم ما تعلمون حتى اتته المنية فصار فى قبره رهينا بذنوبه , ثم قلد ابى الامر وكان غير اهل له ونازع ابن بنت رسول الله صلى الله عليه وسلم فقصف عمره وصار فى قبره رهينا بذنوبه ثم بكى) .
بس اما قال الخطبة دى كان اهله غضبانين منه , لدرجة ان امه قالتله ان ياريتها ما خلفته , وكان طول مدة حكمه مريض , وقاعد فى بيته غير انه فى اواخر حياته , قال خطبة مهمة كانت بتبين موقفه من الخلافة , قال فى الخطبة دى بعد ما حمد ربنا واثنى عليه قال(اما بعد فانى ضعفت عن امركم , فابتغيت لكم مثل عمر بن الخطاب حين استخلفه ابو بكر فلم اجده , فابتغيت ستة مثل ستة الشورى فلم اجدهم , فانتم اولى بامركم فاختاروله من احببتم) , ثم دخل بيته وتغيب حتى مات .
واعتبر المؤرخين ان موقف معاوية ده كان دليل على عدم رضاه عن تحويل الخلافة من الشورى الى الوراثة , لانه كمان رفض ان يعهد لحد من اهل بيته .
كان معاوية مريض لدرجة انه مقدرش يمنع مناطق كتير من الانسلاخ من الحكم الاموى, ووقعت المناطق دى تحت سيطرة “عبد الله بن الزبير” اللى اعلن نفسه هو كمان خليفة على المسلمين , برغم ان معاوية اعلن رفضه لحصار مكة والمدينة وكمان اتبرا علنا من مجزرة عاشوراء وبدا الحكم الاموى يتزعزع , ومبقاش معاوية يخرج للناس وكان “الضحاك بن قيس” هو اللى بيصلى بالناس ويسد الامور لغاية وفاة معاوية .
لكن موت معاوية كان حواليه بعض الغموض , فيه اراء بتقول ان مش بعيد العيلة الاموية هى اللى قتلته , لانه كان دايما بيكرر المقولة دى (اشم رائحة دم ال البيت تفوح من عرش ابى ) , وكان عايز يكفر عن الظلم اللى وقع فى عهد ابوه يزيد.
وقال بعض المؤرخين انه مات مسموم , والبعض الاخر قال انه مات طعنا , وفيه اقاويل انه مات بالطاعون, بس الراى ده استبعد لانه كان حياة الترف بكل اشكالها موجودة , وكمان الطاعون مكنش منتشر فى الوقت ده ولما معاوية بن يزيد , حضرته الوفاة واجتمعو عنده الامويين , طلبو منه تعيين خليفة له من اهل بيته لكن معاوية رفض واتبرا من خلافتهم , ورفض انه يحمل وزرها لانها باطلة, ومات معاوية من غير مايسلم الخلافة لحد فتغلب للحجاز “عبد الله بن الزبير”, وعلى دمشق مروان بن الحكم وده لان معاوية رفض انه يعهد لحد بالخلافة , وكمان مكنش له وريث واخواته كانو صغيرين ومكنوش مؤهلين لاستلام الخلافة, ودفن معاوية جنب قبر والده يزيد فى دمشق بسوريا .
واختلف راى العلماء فى معاوية , فالراى الاول بيقول ان معاوية من اهل النجاة لانه وهو فى بنى امية كان زى مؤمن ال فرعون , والدليل على كده انه اعتزل الخلافة لانه كان شايف ان الامام السجاد اولى بها منه , وكان معاوية معتقد اشد الاعتقاد ان امير المؤمنين على بن ابى طالب واولاده رضى الله عنهم كانو احق بالخلافة من جده وابوه , اما الراى التانى كان شايف ان معاوية بن يزيد كان مذنب ومش من اهل النجاة لانه كان المفروض يسلم الخلافة لاهلها وميكتفيش بعزل نفسه لانه غاضب وخلاص .
عرفنا انت رايك في تعليق هل هو مؤمن ال فرعون ام مذنب ؟
الي هنا تنتهي حلقة اليوم يمكن ان تستمع الي كثير من الفيديوهات علي قناتنا علي اليوتيوب من خلال هذا الرابط ” خلاصة كتاب ”