اهلا بيكم في حلقة جديدة وحلقتنا النهاردة بتتكلم عن خليفة اموي مقدرش يشوف الاستهتار بالحكم والاستخفاف بحدود الله وقام بثورة ضد الفساد عشان يوضع حد للامور دي واخد الخلافة بالقوة وشخصيتنا النهاردة بتكون يزيد بن الوليد
اسمه يزيد بن الوليد بن عبد الملك بن مروان الخليفة القرشي الاموي الملقب بالخليفة الناقص وده لانه حاول يقلد عمر بن عبد العزيز فنقص رواتب الجيش
اتولد يزيد بن الوليد سنة 80 هجريا ويقال انه اعرق الملوك علي وجه الارض وده لان امه هي السيدة شاه افريد بنت فيروز ابن يزد جرد وهو اخر ملوك الفرس ويجمع اصوله بين الدم العربي والفارسي والرومي والتركي فجده لابيه هو عبد الملك بن مروان وهو عربي وجده لامه هو فيروز بن يزد جرد وهو فارسي وجدة جده لامه هي ابنة قيصر وام جدته لامه هي ابنة خاقان الترك وكل الاعراق دي اتجمعت في يزيد الناقص وتقريبا دي حالة فريده من نوعها ان تجتمع كل الاعراق دي في شخص واحد عشان كده كان يزيد بن الوليد كان بيفتخر بنفسه ويقول انا ابن كسري وابي مروان وقيصر جدي وجدي خاقان
كان يزيد اسمر طويل نحيف حسن الجسم والوجه بوجهه خال وكان من العقلاء
قام يزيد بن الوليد بثورة علي ابن عمه الوليد وقتله واستحوذ علي الخلافة وخطب في الناس عشان يبرر قتل الخليفة ووضح منهجه وسياسته وكان بيميل للاصلاح والتقوي وهو اول من خرج بالسلاح في العيدين وخرج بين صفين من الخيل وعليهم سلاح لحد ما راح يصلي في عيد الاضحي
وكمان سلك يزيد منهج مختلف وهو ان كل منظقة من مناطق الدولة الاسلامية هتنفق المال اللي يفيض عن حاجاتها علي شؤنها بدل ارسال الاموال وبكده المال المتوفر يستعملوه عشان يسد حاجات المناطق المجاورة مش عشان يملو خزاين الدولة وكمان امر يزيد بمنع حملات عسكرية تخلي الجيوش بعيدة عن منازلها لمدة طويلة وانه رفض ان الجنود تفضل بعيدة عن وطنهم مدة كبيرة وحاول انه يصلح اللي فسده الخليفة اللي قبله واستعمل يزيد علي العراق منصور بن جمهور وكان من القدرية ولما دخل منصور العراق بعت امير تبعه علي خرسانه فطرده نصر ابن صيار ووقعت فتنه كبيرة في خرصانه ومنتهتش الفتن دي وكانت الفتن شديدة جدا وفضلت مستمرة وللاسف كان فيه خطر اكبر في عهد يزيد والخطر ده كان اشتداد امر العباسيين
وسياسة يزيد كانت بتعتمد علي الاصلاح والتقشف فكان بينهي بني امية عن اعتيادهم الترف والاغاني والمعازف وكان بيحاول انه يصلح اللي اتصدع فيهم وكان عادل وبيحب الخير وبيكره الشر وقال في خطبته اياكم الغناء فانه ينقص الحياء ويهدم المروءة وانه لينوب عن الخمر ويفعل ما يفعل المسكر وكمان وعد اهل الجزية والشعوب المغلوبة في المشرق والمغرب بمعاملة منصفة لان تعرضهم للقهر ودفعهم للضرايب كان سبب اساسي في انهم يهاجروا ويسيبوا اراضيهم عشان كده وعدهم يزيد بالمعاملة المنصفة اللي هتخليهم يخدموا اراضيهم ومش هيضطروا انهم يسيبوها ويهاجروا للمراكز والمدن وبكده هيعالج التفرقة اللي كان حاسس بيها الموالي المسلمين وحب يرجع المساواة اللي طبقها عمر بن عبد العزيز بس كان فيه حاجة مهمة معرفش يزيد يوفقها وده لان الجانب النظري شئ والتطبيق العملي شئ تاني فالخليفة يزيد موفاش بوعوده للناس واضطر انه يحابي اليمنيين اللي ساعدوه في الوصول للخلافة ويغدق عليهم المال
بس ده قلل موار بيت المال ولما المال الموجود في بيت المال قرب يخلص اضطر يزيد انه ينقص رواتب الجنود فسموه الناقص وكل ده سبب ثورات ضده وفضل مدة خلافته القصيرة يحاول القضاء علي الثورات دي والاوضاع العامة في عهده مرت بمرحلتين المرحلة الاولي كانت بسبب مقتل الوليد وردة الفعل اللي حصلت بعد قتل الوليد
اما المرحلة التانية تمرد البعض بسبب التغيرات الادارية والاثار السلبية للتغيرات دي اثرت علي اوضاع الدولة الدخلية واثرت علي سير الحكم والظاهر ان شخصية يزيد مكنش عليها جماع كبير من الامويين وكتير منهم مكنوش بيحبو يزيد وكل ده خلق صراعات وثورات ده غير الفتن بين اليمن وقيس في خراسان وباقي المشرق واليمامة واتقاتل الفريقين وجرت بينهم معارك ايام طويلة تشبه ايام الجاهلية
حتي اهل فلسطين خرجوا في حمله ضد يزيد لكن يزيد اتصدي ليهم بس للاسف الصراعات والثورات دي اثرت تأثير شديد وبقي في فجوة كبيرة في البيت الاموي وعشان كده اول ما اتولي يزيد قام بعزل الولاة وعين مكانهم ولاة تانيين منهم منصور بن جمهور اللي عينه علي العراق لان منصور وقف جنب يزيد لما ثار علي الوليد وشارك في قتله ده غير كده ان منصور هو اللي قرا كتاب الخليفة علي الناس وبرر قتل الوليد وكان القيام سبب في مبايعة الناس ليزيد وكمان كتير كان بشهد له بالشجاعة ومعرفته بالحرب واخلاقه الحسنة وعشان كده ولاه يزيد علي العراق وخراسان وفي السنة دي كتب مروان بن محمد الملقب بالحمار ولقبوه بكده لشدة باسه وتحمله للمشاق وكتب مروان بن محمد كتاب لعمر بن يزيد اخو الوليد يحرضه علي القيام بطلب دم اخوه الوليد وكان مجهز جيش كبير لمحاربة يزيد عشان يثأر للوليد وكان معروف بقوته بين امراء بني امية فبعث اليه يزيد بن الوليد ثابت بن نعيمة والتقي الفريقان
واتغلب مروان بن محمد علي ثابت واسره وعلت مكانته وشانه فكتب له يزيد انه يوليه الجزيرة وارمينية والموصل واذريبيجان لو بايع يزيد فقبل وفضل هناك لحد ما مات يزيد واتنازل يزيد عن الخلافة لاخوه ابراهيم بن الوليد لما مرض بمرض الطاعون
وكانت خلافة يزيد 6 شهور بس ونقش خاتمه ( العظمة لله )
وكان يزيد صالح ويقال في المثل ( الاشج والناقص اعدلا بني مروان ) والمراد بالاشج عمر بن عبد العزيز والناقص زيد بن الوليد
ومات زيد بن الوليد بالخضراء في ذي الحجة سنة 126 هجريا ودفن بباب الفراديس وصلي عليه اخوه ابراهيم بن الوليد وهو ولي العهد من بعده
وبكده تكون خلصت حلقتنا والسلام عليكم ورحمة الله وبركاته
اهم المصادر :
يزيد الناقص ابو خالد بن الوليد عهد بني امية لجلال الدين السيوطي
كتاب البداية والنهاية لابن كثير