اهلا بيكم فى حلقة جديدة من خلاصة كتاب , وحلقتنا النهاردة بتتكلم عن شخصية اثرت كتير فى التاريخ الاسلامى , وتعتبر من اهم المؤسسين للدولة الاموية , لان حصل فى عهدها اصلاحات وفتوحات كتير جدا , وشخصيتنا النهاردة بتكون الوليد بن عبد الملك ولقب “بابوالعباس” .
الأسم و النسب
اسمه الوليد بن عبد الملك بن مروان بن الحكم بن ابى العاص بن امية الاموى القرشى , امه هى وليدة بنت العباس بن حزن الحارثية العبسية.
نشأته
اتولد فى المدينة المنورة سنة 50 هجرية , لكن بعد فترة هاجر مع اهله الى الشام وكان والده عبد الملك حريص جدا على تربية اولاده , تربية صحيحة وتدريبهم على القتال لكن كان فيه بعض الترف ويقال ان والده عبد الملك كان عايز يعهد للوليد بالخلافة لكنه اتوقف لان الوليد كان بيغلط فى اللغة العربية ولما سمع الوليد بكده جمع اهل النحو وقعدهم معاه 6 شهور ويقال سنة لكن من ناحية تانية كان بيتميز الوليد بالصدق والاخلاق وحب القران وتعليمه اما عن شكله الظاهرى فكان افطس الانف اسمر اللون وطويل وشب الوليد على حب القران وكان بيقراه كتير لدرجة كان بيختمه فى رمضان 17 ختمة وكان بيوزع قطع الفضة لحفظة القران
زوجته هى ام البنين بنت عبد العزيز بن مروان وبنت عمه كانت معروفة بنقاءالقلب وحب القران وكثرة الذكر وكانت على درجة عالية من الورع والعطاء وكان للوليد من الابناء 14 ولد
وبعد وفاة عمه عبد العزيز بن مروان كتب عبدالملك بالبيعة لاولاده
الوليد وسليمان ووافق الجميع البيعة ولماتوفى عبد الملك تولى ابنه الوليد الخلافة فى 15 شوال سنة 86 هجرية
نيجى بقى لسياسة الوليد الداخلية تعالو نشوف سياسة الوليد بن عبد الملك كانت عاملة ازاى
طبعا والده عبد الملك كان مسهل كل الصعوبات وممهد الطريق ومجهزه للى هييجى من بعده وزى ما احنا عرفنا ان الدولة فى عهد عبد الملك كانت مليانة بالصراعات والحروب الداخلية لكن قدر عبد الملك ان يقضى عليها تماما وخلاها دولة مستقرة واستلمها ابنه الوليد فى هدوء ويسروده خلى الوليد يتفرغ لبناء الدولة وتوسيعها ومشى على نهج والده وعمل بنصايحه وكان من الشخصيات المقربة جدا للوليد الحجاج بن يوسف الثقفى اللى استعان بيه وولاه على العراق بالرغم من قسوته بس كان شايف ان اهل العراق محتاجين لرجل حازم وشديد زى الحجاج بن يوسف وكمان الحجاج كان مخلص لدولة بنى امية
وفى عهد الوليد بن عبد الملك اتوسعت الفتوحات الاسلامية جدا ووصلت لبلاد ما وراء النهر لقرب حدود الصين وفتحو السند والهند ده كانت الفتوحات اللى فى الجناح الشرقى اما الغربى اتمكن المسلمين من فتح الاندلس (اسبانيا) بقيادة القائد العظيم طارق بن زياد وموسي بن النصير وده كان بيدل على ذكاء الوليد وحرصه على اختيار القادة المخلصين اللى ساعدوه فى توسيع الدولة الاسلامية وازدهارها وانتشر الاسلام وفضلت الحملات على بلاد الروم فترة كبيرة وفتحوا حصون البزنطيين لدرجةان موسى ابن النصير عزم على مواصلة الفتح لغاية ما وصل للقسطنطينية وفى الوقت ده بعث له الوليد وامره ان يوقف الفتوحات ويرجع لدمشق
وبكده بقت الدولة الاموية اكبر امبراطورية اسلامية عرفها التاريخ وده كان بفضل الوليد بن عبد الملك وكمان القادة اللى كان بيختارهم وكمان كان بيتابعهم اول باول ويبعتلهم الدعم اللازم باستمرار ومن القادة دول سعيد بن جبير وسعيد بن المسيب ويزيد بن الملهب وخالد بن عبد الله بن يزيد القسرى وموسى بن النصير وطارق بن زياد
ومش بس النهضة فى الفتوحات لا ده كان فيه كمان حضارة عمرانية عظيمة موجودة لوقتنا ده وكل اللى يشوفها يعرف اد ايه كانت حضارة اسلامية عريقة شهد لها العالم بعظمتها على مر العصور
وكان للوليد الفضل فى ازدهار العمران فى الوقت ده لانه كان بيحب الفن والعمارة وكان بيقدرها جدا وبدا يحسن الطرق بالذات طرق الحجاج والمعتمرين وامر بحفر الترع والابارووضع علامات على طول الطرق وكمان كلف ابن عمه عمر بن عبد العزيز بالاشراف على توسعة المسجد النبوى وحاول بكل جهده ان يبين المسجد النبوى فى ابهى صوره ومن اهم اعمال الوليد بن عبد الملك بناء الجامع الاموى فى دمشق وصرف اموال ضخمة جدا على المسجد ده لدرجة انه كان علامة بارزة لفن العمارة الاسلامية ومش بس اهتم الوليد بالفتوحات والمعمار ده كان كمان بيهتم بالمكفوفين والفقراء والايتام وكان بيعطى خادم لكل ضرير وكان بيمر على الاسواق ويظبط الاسعار بنفسه واصلح عمليات الرى ومنع الهجرة من الريف للمدن عشان الزراعة محتاجة ايادى عاملة وعمل بيت للضيافة وشجع الحرف والاداب والفنون وكمان استكمل عملية التعريب اللى كان والده عبد الملك بداه ومشى على نفس النهج فامر واليه على مصر عبد الله بن عبد الملك بتدوين الدواوين فى مصر باللغة العربية بعد ما كانت بتتكتب بالقبطيه وكل ده ساعد في انتشار اللغه العربيه وكان من نتيجة استقرار الدولة الاسلامية ان زاد فيها الرخاء واتكدست الخزاين بالمال ودا اللي شجع الوليد انه ينفق علي البنا والتشييد والعمران وكمان عمل رواتب لاصحاب العاهات وعمل خدمات كتير للناس ةنجح الوليد في مدة خلافتة اللي كانت يدوب حوالي عشر سنين انه يبني دولة عظيمة الناس بتتنعم في ظلها بالرخاء ونشط حركة العمران وحصل نهضة حضارية خارجية وداخلية وانتشرت حلقات العلم في المساجد الكبيرة لدرجة ان دولته في الوقت ده كانت اقوي دولة في العالم واتوصف عصر الوليد بن عبد الملك بانه العصر الذهبي للدولة الاموية
توفي الوليد بن عبد الملك في نصف جمادي الاخرة سنة 96هجريا بمنطقة دير مروان بدمشق ودفن في دمشق وكان عمره 48سنة واللي صلي عليه عمر بن عبد العزيز لان اخوه سليمان كان في الوقت ده في القدس وهو كمان اللي نزله قبره
وبكده تكون خلصت حلقتنا والسلام عليكم ورحمة الله وبركاته
المصادر
كتاب الخليفه الوليد بن عبد الملك ودورة في الدولة الاموية اعداد عاصم خلف الله الامين البشير
